ആരിഫയെ കണ്ട് പഠിക്കാം വിജയം ഉറപ്പ്

അഷ്റഫ് കൊട്ടോടി

കാഞ്ഞങ്ങാട് :അധ്യാനിക്കാനുള്ള മനസും ആഗ്രഹവുമു ണ്ടെങ്കിൽ എത് സംരംഭവും വിജയിക്കുമെന്നതാണ്

ഉദുമ നാലാം വാ തുക്കൽമൂലയിൽ വീട്ടിൽ ആരിഫ ഷമീർ നൽകുന്ന പാഠം.

ഡെയറി ഫാമിങ്ങിലൂടെ മികച്ച വരുമാനം നേടാൻ സാധിക്കുമെന്ന് കാണിച്ചുതരുകയാണ് ഈ വീട്ടമ്മ. ഉദുമ മൂലയിൽ വീടിനോട് ചേർന്നുള്ള 30 സെന്റ് സ്ഥലത്താണ്  ആരിഫയുടെ പശു ക്കളെ വളർത്തലും പാൽ ഉൽപ്പന്നങ്ങളുടെ നിർമ്മാണവും.  ഒരു പശുവിൽനിന്ന് തുടങ്ങിയ ആരിഫയുടെ ഡെയറി ഫാമിങ് ജീവിതം ഇന്ന് പാലും പാലുൽപന്നങ്ങളും വിൽക്കുന്ന  മിൽക്ക് പ്രൊഡക്ട്  സംരംഭമായി വളർന്നു.  ലെസ്സി, സിപ് അപ്, പേഡ തുടങ്ങി ഒട്ടേറെ പാലുൽപന്നങ്ങൾ സ്വന്തമായി നിർമിച്ച് സ്വന്തം കടയിലൂടെ വിൽക്കുന്ന വേറിട്ട സംരംഭമാണ് ആരിഫയുടേത്. കഴിഞ്ഞ ഒരാഴ്ചയിലേറെയായി നടന്ന

അലാമിപ്പള്ളിയിലെ എന്റെ കേരളം പ്രദർശന വിപണന മേളയിലും  ആരിഫ യുടെ പാൽ ഉൽപ്പന്നങ്ങൾ ശ്രദ്ധ പിടിച്ചു പറ്റിയിരുന്നു. ആരിഫ  യും മക്കളും ചേർന്ന് നടത്തിയ കച്ചവടം ഉഷാറായി തന്നെ നടന്നു.

 സ്വന്തം ഭാവനയിൽ തുടങ്ങിയ മിൽക്ക കമ്പനിയുടെ പാലുത്പന്നങ്ങളായിരുന്നു ഇവരുടെ സ്റ്റാൾ നിറയെ. നേരത്തെ സ്കൂൾ അധ്യാപികയായിരുന്നു ഇവർ. അതൊക്കെ വിട്ടാണ് കൊവിഡിന് ശേഷം പുത്തൻ സംരംഭം തുടങ്ങിയത്. വീട്ടിൽ എട്ടോളം പശുക്കളുണ്ട്. ഇവയിൽ നിന്നും കറന്നെടുത്ത പാല് കൊണ്ടാണ് സംരംഭം മുന്നോട്ട് കൊണ്ടുപോകുന്നത്. 10 ലിറ്റർ പാൽ വില കൊടുത്ത് വാങ്ങിയ ശേഷമാണ് പാലുൽപ്പന്നങ്ങൾ ഉണ്ടാക്കാൻ പഠിച്ചു തുടങ്ങിയത്.

യൂടൂബ് നോക്കിയായിരുന്നു പശുകറവയും പാലുത്പന്നങ്ങൾ ഉണ്ടാക്കാനുമൊക്കെ പഠിച്ചത്. പിന്നാലെ, ക്ഷീര വികസന ഓഫീസർ ഇടപെട്ട് ഇവരെ കോഴിക്കോട് അയച്ച് പരിശീലിപ്പിച്ചു. അടുത്തിടെ മണ്ണുത്തിയിൽ ആദരിച്ച നാല് സംരംഭകരിൽ ഒരാൾ ആരിഫയായിരുന്നു. അധ്യാപകനായ ഭർത്താവ് ഷമീറും മക്കളും സഹായവുമായി കൂടെയുണ്ട്. മക്കളായ ഷമീല, സുഹൈല, അമീൻ, അമാൻ എന്നിവർ പശുവിനെ പരിപാലിക്കാനും കൂടെ കാണും. ആരിഫാബി വിപണനത്തിനൊക്കെ പുറത്തുപോയാൽ വീട്ടുഭരണം മക്കളുടെ കയ്യിലാണ്. 20 ലക്ഷത്തോളം ചിലവഴിച്ചാണ് യൂണിറ്റ് തുടങ്ങിയത്. ഇതിന് സർക്കാരിന്റെയും മറ്റ് വകുപ്പുകളുടെയും അകമഴിഞ്ഞ പിന്തുണയും ലഭിച്ചു. കഴിഞ്ഞയാഴ്ച മറ്റൊരു മിഷണറി കൂടി ആരിഫ  വാങ്ങിയിട്ടുണ്ട്. പാക്കിംഗ് മെഷീൻ കൂടി വാങ്ങി വിപണി കൂടുതൽ വി ഫുലീകരിക്കുകയാണ് ലക്ഷ്യമെന്ന് ആരിഫ  പറഞ്ഞു. ഭർത്താവും മക്കളുമാണ് ഇത് വരെ സഹായത്തിനുള്ളത്. വിപണിയിലേക്ക് കൂടുതൽ സാധനമെത്തുമ്പോൾ പുറത്ത് നിന്നും ജോലിക്ക് ആളെ വെക്കേണ്ടിവരുമെന്ന് അവർ പറഞ്ഞു.

വിജയ രഹസ്യങ്ങൾക്ക് പിന്നിൽ

കഷ്ടപ്പാടുകൾ ഏറെയുണ്ട് ആരിഫ ക്ക് .

അതിരാവിലെ മൂന്നരയ്ക്ക് തന്നെ ഉറക്കമുണരും.

പാലുൽപന്നങ്ങളുടെ പായ്ക്കിങ്ങും മറ്റും ചെയ്യും. ശേഷം തൊഴുത്തിലേക്ക്. തൊഴുത്തു വൃത്തിയാക്കി പശുക്കളെ കുളിപ്പിച്ചാണ് കറവ. ഭർത്താവും കറവയ്ക്ക് സഹായിക്കും. ശേഷം പുല്ല് നൽകും. എട്ടു മണിയാകുമ്പോൾ പാലും പാലുൽപന്നങ്ങളുമായി ആരിഫ തന്റെ ഇലക്ട്രിക് സ്കൂട്ടറിൽ ഇളയ മോനോടൊപ്പം കടയിലേക്ക് യാത്രയാകും. പശുക്കളുടെ കാര്യങ്ങളും പാലുൽപന്ന വിൽപനയിലും ആരിഫ ശ്രദ്ധിക്കുമ്പോൾ അടുക്കള കൈകാര്യം ചെയ്യുന്നത് മക്കളായ ഷമീലയും സുഹൈലയും അമീനുമാണ്.

പാലുൽപന്നങ്ങൾ

സിപ് അപ്, തൈര് ഉപയോഗിച്ച് വിവിധ രുചികളിൽ ലെസി, ശ്രീകണ്ഡ്, പേഡ, പനീർ, പനീർ ഉപയോഗിച്ചുള്ള ഛന്നാമുർഗി എന്നിങ്ങനെ ഉൽപന്നങ്ങളുടെ നിര നീളും. ഇതിൽ പലതും ഓർഡർ അനുസരിച്ച് തയാറാക്കി നൽകുന്നവയാണ്. സിപ് അപ്, സംഭാരം, തൈര്, ലെസ്സി, ബർഫി എന്നിവയ്ക്ക് എപ്പോഴും ആവശ്യക്കാരുണ്ടെന്നും ആരിഫ. ജിമ്മിൽ പോകുന്നവർ സ്ഥിരമായി വാങ്ങുന്നത് പനീർ വിഭവങ്ങളാണ്.

ഇപ്പോൾ പ്രതിദിനം 40 ലീറ്റർ പാലാണ് ഉൽപാദനം. 5 ലീറ്ററോളം പാൽ സംഘത്തിൽ അളക്കുന്നു. കൂടാതെ, അര ലിറ്റർ കവറിലാക്കി 30 രൂപ വിലയിൽ പാൽ വിൽപനയുമുണ്ട്. തൈര് 350 മില്ലിയുടെ പ്രത്യേക പായ്ക്കറ്റിലാക്കി 25 രൂപയ്ക്കും വിൽക്കുന്നു. പശുക്കളുടെ മൂത്രം ലീറ്ററിന് 50 രൂപ നിരക്കിൽ വില്പനയുമുണ്ട്.

പച്ചക്കറിക്കൃഷിയുള്ളവരും നഴ്സറികളുമാണ് ഇത്തരത്തിൽ മൂത്രവും ചാണകവും വാങ്ങുന്നത്.

മുപ്പത് സെന്റ് സ്ഥലത്തും തൊട്ടടുത്ത് പാട്ടത്തിനെടുത്ത 30 സെന്റ് ഭൂമിയിലും പുൽ കൃഷി നടത്തിയാണ് പശുക്കൾക്ക് വേണ്ട തീറ്റ കണ്ടെത്തുന്നത്. സ്വന്തമായി തീറ്റ ഉത്പാദിപ്പിച്ച് സ്വന്തം പശുക്കളുടെ പാൽ കൊണ്ട് മായ മേതുമില്ലാതെ ആരിഫ  യുടെ മിൽക്കാസ് ഡയറി മിൽക്സ് ഉൽപ്പന്നങ്ങൾ കൂടുതൽ കൂടുതൽ വിപണി കീഴടക്കുകയാണ്.

പടം :ആരിഫ താനുണ്ടാക്കിയ ഉൽപ്പന്നങ്ങളുമായി.