മഴയെ പേടിച്ച് കഴിഞ്ഞ കെ.രാമകൃഷ്ണനും ഭാര്യ കെ.ടി.ജയക്കും ആശ്വാസമായി മന്ത്രിയുടെ ഉറപ്പ്

കാസർകോട് :

മഴ ബെര്ന്ന് പറയുമ്പോഴെ പേടിച്ചിട്ട് കഴിയുകയായിരുന്നു. ഇപ്പോളാന്ന് സമാധാനായെ' നിറകണ്ണുകളോടെ സന്തോഷം നിറഞ്ഞ മനസ്സുമായി മണ്ഡലി പാറയിലെ ജയ പറഞ്ഞു. ചോർന്നൊലിക്കുന്ന ഷെഡിൽ മഴക്കാലമായാൽ എങ്ങനെ കഴിയുമെന്ന ആധിയിലായിരുന്നു ഈ നിർധന കുടുംബം. ചെമ്മനാട് പഞ്ചായത്തിലെ പതിനൊന്നാം വാർഡ് മണ്ഡലിപ്പാറയിലെ 15 സെന്റ് സ്ഥലത്താണ് 58 വയസുകാരനായ  കെ.രാമൃഷ്ണനും ഭാര്യ കെ.ടി.ജയയും താമസിക്കുന്നത്. മേൽക്കൂര പോലുമില്ലാതെ ടാർപ്പായ വിരിച്ച, വീടെന്നും പോലും പറയാൻ കഴിയാത്ത ഷെഡിലാണ് ഈ കുടുംബം കഴിയുന്നത്. മൂന്ന് പെൺ മക്കളാണ് ഇവർക്ക്. കൂലിപണി ചെയ്ത് ജീവിതത്തിന്റെ രണ്ടറ്റവും കൂട്ടി മുട്ടിക്കാനുള്ള പെടാപാടിൽ പൊട്ടി പൊളിഞ്ഞ വീടിനെ നോക്കി ദീർഘ നിശ്വാസമിടാനേ ഇവർക്ക് നിവർത്തിയുള്ളു. ലൈഫ് പദ്ധതിയിൽ വീടിനായി അപേക്ഷ നൽകിയുന്നു. 168 - മത് നമ്പറാണ് ഇവരുടത്. 100 വീടുകൾ ഇതിനകം നൽകി കഴിഞ്ഞു. വീടെന്ന സ്വപ്നം സാക്ഷാത്കരിക്കാൻ കരുതലും കൈതാങ്ങും കാസർകോട് താലൂക്ക് അദാലത്തിൽ അപേക്ഷ നൽകി. ഇതോടെ വീടെന്ന സ്വപ്നം ഇവർക്കു മുൻപിൽ യഥാർഥ്യമാകുകയാണ്. എത്രയും വേഗം വീടിന്റെ ശോച്യാവസ്ഥയ്ക്ക് താത്കാലിക പരിഹാരം കാണാൻ ബന്ധപ്പെട്ട ഉദ്യോഗസ്ഥർക്ക് മന്ത്രി അഹമ്മദ് ദേവർകോവിൽ നിർദേശം നൽകി. ലൈഫ് പദ്ധതിയിലൂടെ വീട് നൽകാമെന്ന് ഉറപ്പും മന്ത്രി കുടുംബത്തിന് നൽകി.

ബണ്ടിച്ചാലിലെ ആയിഷയ്ക്ക് അദാലത്ത് വേദിയില്‍ ബി.പി.എല്‍ കാര്‍ഡ് ഉറപ്പ് നല്‍കി മന്ത്രി അഹമ്മദ് ദേവര്‍കോവില്‍ 

ചെമ്മനാട് പഞ്ചായത്തിലെ ബണ്ടിച്ചാല്‍ സ്വദേശി ആയിഷയ്ക്കും അദാലത്ത് നല്‍കിയത് നിറയെ സന്തോഷം. ഭര്‍ത്താവ് മരിച്ചതിനുശേഷം കുഞ്ഞുങ്ങളുമായി താമസിക്കുകയാണ് ഇവര്‍. ഒന്നരവര്‍ഷം മുന്‍പ് കാര്‍ഡ് ബി.പി.എല്‍ ആയി ലഭിക്കാന്‍ വേണ്ടി ഇവര്‍ അപേക്ഷ നല്‍കിയിരുന്നു. എന്നാല്‍  ഇതുവരെയും ഈ വിഷയത്തില്‍ തീരുമാനമായിരുന്നില്ല. അഹമ്മദ് ദേവര്‍കോവില്‍ മന്ത്രിയുടെ മുന്നിലെത്തിയ അപേക്ഷ സ്വീകരിച്ച് അദാലത്ത് വേദിയില്‍ നിന്ന് തന്നെ ഇവര്‍ക്ക് ബി.പി.എല്‍ കാര്‍ഡ് നല്‍കാൻ ജില്ലാ സപ്ലൈ ഓഫീസർക്ക് നിർദേശം നൽകി. അദാലത്തില്‍ വരുമ്പോള്‍ ഇത്രവേഗം തീര്‍പ്പുണ്ടാകും എന്ന് അറിഞ്ഞിരുന്നില്ല എന്നും അദാലത്ത് വേദിയില്‍ നിന്നുതന്നെ റേഷന്‍ കാര്‍ഡ് ബി.പി.എല്ലായി മാറ്റിയതിൽവളരെ സന്തോഷവതി ആണെന്നും ആയിഷ പറഞ്ഞു.