നീലേശ്വരം :കേരള ടൂറിസം വകുപ്പിന്റെ ആഭിമുഖ്യത്തില്‍ ജില്ലയില്‍ ആദ്യമായി സംഘടിപ്പിക്കുന്ന ചാമ്പ്യന്‍സ് ബോട്ട് ലീഗ് മത്സരങ്ങള്‍ക്ക് ഇന്ന് തുടക്കമാകും. അച്ചാംതുരുത്തി കോട്ടപ്പുറം പാലത്തിന് സമീപം വെച്ച് ഇന്ന് നടക്കുന്ന മത്സരം പൊതുമരാമത്ത്, ടൂറിസം വകുപ്പ് മന്ത്രി. പി.എ. മുഹമ്മദ് റിയാസ് ഉദ്ഘാടനം ചെയ്യും. എം. രാജഗോപാലന്‍ എം.എല്‍.എ അധ്യക്ഷത വഹിക്കുന്ന ചടങ്ങില്‍
രാജ്മോഹന്‍ ഉണ്ണിത്താന്‍ എം.പി മുഖ്യാതിഥിയാകും. എം.എല്‍.എ.മാരായ ഇ.ചന്ദ്രശേഖരന്‍, സി.എച്ച്. കുഞ്ഞമ്പു, എന്‍.എ. നെല്ലിക്കുന്ന്, എ.കെ.എം. അഷ്‌റഫ്, ജില്ലാ പഞ്ചായത്ത് പ്രസിഡന്റ് പി.ബേബി ബാലകൃഷ്ണന്‍, ജില്ലാ കളക്ടര്‍ കെ.ഇമ്പശേഖര്‍ എന്നിവര്‍ പങ്കെടുക്കും. വിനോദസഞ്ചാര സാധ്യതകള്‍ക്ക് ഊന്നല്‍ നല്‍കിയാണ് സംസ്ഥാന സര്‍ക്കാര്‍ സി.ബി.എല്‍ സംഘടിപ്പിക്കുന്നത്.
മത്സരങ്ങളില്‍ പതിനാറോളം ടീമുകള്‍ മാറ്റുരയ്ക്കും.
പൊലീസ് അറിയിപ്പ്
ഇന്ന് നീലേശ്വരം കോട്ടപ്പുറം അച്ചാംതുരുത്തിയിൽ നടക്കുന്ന ചാമ്പ്യൻസ് ബോട്ട് ലീഗ് മത്സരത്തോടനുബന്ധിച്ച് ട്രാഫിക്ക് ക്രമീകരണങ്ങൾ ഉണ്ടായിരിക്കുന്നതാണ്. നീലേശ്വരം ഭാഗത്ത് നിന്നും വരുന്ന വാഹനങ്ങൾ കോട്ടപ്പുറം അമ്പല മൈതാനിയിലും, കോട്ടപ്പുറം സ്കൂൾ ഗ്രൗണ്ടിലും പാർക്ക് ചെയ്യുക. മടക്കര - ചെറുവത്തൂർ ഭാഗത്ത് നിന്നും വരുന്ന വാഹനങ്ങൾ ബാലഗോകുലം അമ്പല മൈതാനിയിലും , രാജാസ് സ്കൂൾ പരിസരത്തും പാർക്ക് ചെയ്യുക. കോട്ടപ്പുറം അമ്പലം മുതൽ പാലം വരെ റോഡരികിൽ വാഹനങ്ങൾ നിർത്തിയിടാൻ പാടില്ല. ഗതാഗത തടസ്സം ഉണ്ടാകുന്ന രീതിയിൽ പാർക്ക് ചെയ്യുന്ന വാഹനങ്ങൾക്ക് എതിരെ നിയമ നടപടികൾ സ്വീകരിക്കുന്നതാണ്. കൂടാതെ പുഴയിൽ വരുന്ന ചെറുവള്ളങ്ങൾക്ക് നിയന്ത്രണം ഏർപ്പെടുത്തിയിട്ടുണ്ട്. ട്രാക്കിന് സമീപവും ഫിനിഷിങ്ങ് പോയിൻ്റിന് സമീപവും ചെറുവള്ളങ്ങൾക്ക് പ്രവേശനമില്ല. കുട്ടികളെയും സ്ത്രീകളെയും കൊണ്ടും ചെറുവള്ളങ്ങൾ പുഴയിൽ ഇറക്കുവാൻ പാടില്ല. ട്രാക്കിന് കുറുകെ പോകുന്ന വള്ളങ്ങൾ പിടിച്ചെടുക്കുന്നതാണ്. പൊലീസ് അറിയിച്ചു.
0 Comments