കാഞ്ഞങ്ങാട് ; പുല്ലൂര്‍ കൊടവലത്തെ സ്വകാര്യവ്യക്തിയുടെ പറമ്പിലെ കുളത്തില്‍ നിന്നും വനപാലകർ പിടികൂടിയ ഒരു വയസ് പ്രായമുള്ള പുലിയെ കാഞ്ഞങ്ങാട് ഫോറസ്റ്റ് റെയ്ഞ്ച് ഓഫീസില്‍ നിന്ന് തൃശൂരിൽ എത്തിച്ചു. ഇവിടെ വെറ്ററിനറി ഇൻറൻസീവ് കെയറിലാക്കിയ പുലിക്ക് തുടർ ചികിൽസ നടത്തിവരികയാണെന്ന് വനപാലകർ അറിയിച്ചു.കാഞ്ഞങ്ങാട് ഫോറസ്റ്റ് ഓഫീസിന് പിറകിലെ കെട്ടിടത്തിന് സമീപം കൂട്ടില്‍ സൂക്ഷിച്ച പുലിയെ പ്രത്യേക വാഹനത്തിലാക്കി തൃശൂരിലെത്തിക്കുകയായിരുന്നു. തൃശൂർ പുത്തൂരിലെ വെറ്റിനറി യൂണിറ്റിലാണ് പുലിയുള്ളത് . ഞായറാഴ്ച വൈകിട്ട് കൊടവലത്തെ നീരളംകൈയിലെ മധുവിന്റെ പറമ്പിലെ കുളത്തിലാണ് പുലിയെ കണ്ടത്. തുടർന്ന് കാഞ്ഞങ്ങാട്ഫോറസ്റ്റ് റെയ്ഞ്ച് ഓഫീസിലേക്ക് കൊണ്ടുപോകുകയായിരുന്നു.പരിശോധനയില്‍ പുലിയുടെ കൈവിരലുകളിലെ നഖങ്ങള്‍ അറ്റുപോയതായും ദേഹത്ത് ചില ഭാഗങ്ങളില്‍ പരിക്കുള്ളതായും കണ്ടെത്തി. ഈ സാഹചര്യത്തില്‍ ചൊവ്വാഴ്ച രാത്രി വൈകും വരെ പുലിയെ ഫോറസ്റ്റ് ഓഫീസില്‍ പാര്‍പ്പിിക്കുകയും ചികിൽസ നൽകിയ ശേഷം തൃശൂരിലേക്ക് കൊണ്ടുപോകുകയുമായിരുന്നു. കാഞ്ഞങ്ങാട് ഫോറസ്റ്റ് റെയിഞ്ച് ഓഫീസർ രാഹുൽ ഉൾപെടെ വനം വകുപ്പ് ഉദ്യോഗസ്ഥർ പുലിയെ അനുഗമിച്ച് തൃശൂരിലെത്തി. നടപടി ക്രമങ്ങൾ പൂർത്തിയാക്കി ഉദ്യോഗസ്ഥർ കാഞ്ഞങ്ങാട്ടേക്ക് മടങ്ങി. ചികിൽസ പൂർത്തിയായ ശേഷം മാത്രമെ പുലിയെ എന്ത് ചെയ്യണമെന്നത് സംബന്ധിച്ച് മൃഗസംരക്ഷണവകുപ്പ് തീരുമാനമെടുക്കുവെന്ന് ഉദ്യോഗസ്ഥർ പറഞ്ഞു.
പടം : തൃശൂരിലെ ചികിൽസ കേന്ദ്രത്തിൽ പുലി.
0 Comments