കയ്യൂരിലെ വനിതകൾ കാഞ്ഞങ്ങാട് നഗരസഭയിൽ നേർക്കുനേർ ഏറ്റ് മുട്ടുന്നു

കാഞ്ഞങ്ങാട് :കയ്യൂരിൽ നിന്ന് മരുമക്കളായി എത്തിയവർ തമ്മിൽ കാഞ്ഞങ്ങാട് നഗരസഭ 20 ആം വാർഡ് മോനാച്ചയിൽ ഏറ്റ് മുട്ടുന്നു. എൽ.ഡി.എഫ് - യു.ഡി.എഫ് മുന്നണികൾക്ക് വേണ്ടിയാണ് ഇരുവരും പോരാട്ടത്തിനിറങ്ങിയത്.കയ്യൂർ മയ്യലിൽ സ്വദേശിനി മോനാച്ചയിലെ സന്തോഷിൻ്റെ ഭാര്യ രേവതിയും കയ്യൂരിലെ മുഴക്കോത്ത് സ്വദേശിനി ഉപ്പിലിക്കെെ ഏഴാംന്തോട്ടിലെ കരുണാകരൻ്റെ ഭാര്യ രുഗ്മിണിയും തമ്മിലാണ് വാർഡിൽ കടുത്ത മത്സരം നടക്കുന്നത്. ഇരുവരുടെയും ജീവിത പങ്കാളികൾ കോൺഗ്രസ് പ്രവർത്തകരാണ്. രേവതിയും രുഗ്മിണിയും സി.പി.എം കുടുംബത്തിൽ നിന്നുള്ളവരാണ്. രുഗ്മിണി ജനാധിപത്യ മഹിള അസോസിയേഷൻ നേതാവാണ്. സ്വന്തം കുടുംബത്തിൻ്റെ കമ്യൂണിസ്റ്റ് പാരമ്പര്യം രേവതിയുടെ സ്ഥാനാർത്ഥിത്വത്തിന് തടസമായില്ല. ഭർത്താക്കന്മാരുടെ കോൺഗ്രസ് പാരമ്പര്യവും രണ്ട് പേർക്കും തടസമുണ്ടാക്കിയില്ല. രുഗ്മിണിയുടെ ഭർത്താവ് കരുണാകരൻ്റെ അനുജനായ മധുവിൻ്റെ ഭാര്യ എ.ഭാരതി ചതുരക്കിണർ വാർഡ് 22 ലെ യു.ഡി.എഫ് സ്ഥാനാർത്ഥിയാണ്.