പെൺകുട്ടികളുടെ ചിത്രങ്ങൾ മോർഫ് ചെയ്ത് പ്രചരിപ്പിച്ച യുവാവ് അറസ്റ്റിൽ

കാസർകോട്: പെൺകുട്ടികളുടെ ചിത്രങ്ങൾ അറിവോ സമ്മതമോ ഇല്ലാതെ ശേഖരിച്ച്, സാങ്കേതികവിദ്യയുടെ സഹായത്തോടെ മോർഫ് ചെയ്ത് അശ്ലീല ദൃശ്യങ്ങളാക്കി മാറ്റി ടെലഗ്രാം ഗ്രൂപ്പുകൾ വഴി പ്രചരിപ്പിച്ച കേസിൽ പ്രധാന പ്രതിയെ കാസർകോട് സൈബർ ക്രൈം പൊലീസ് അറസ്റ്റ് ചെയ്തു. മലപ്പുറം പുഴക്കാട്ടിരി സ്വദേശി നികേത് 24 ആണ് പിടിയിലായത്.

 കേസിൽ രണ്ടാം പ്രതിയാണ്  പിടിയിലായ നികേത്. കേസിലെ ഒന്നാം പ്രതിയായ കാസർകോട് ഇരിയണ്ണി സ്വദേശി അനൂപിനെ മുൻപ് അറസ്റ്റ് ചെയ്തിരുന്നു. തുടർന്ന് നടത്തിയ  അന്വേഷണത്തിലാണ് ഒന്നാം പ്രതി കൈമാറിയ പെൺകുട്ടികളുടെ ഫോട്ടോകൾ എഡിറ്റ് ചെയ്ത് അശ്ലീല ചിത്രങ്ങളാക്കി മാറ്റിയത്  രണ്ടാം പ്രതിയാണെന്ന് കണ്ടെത്തിയത്.

 പുഴക്കാട്ടിരിയിൽ വച്ചാണ്  പ്രതിയെ കസ്റ്റഡിയിലെടുത്തത്. സൈബർ ക്രൈം പൊലീസ്  ഇൻസ്‌പെക്ടർ കെ. രാജീവൻ്റെ നിർദ്ദേശപ്രകാരം സബ് ഇൻസ്‌പെക്ടർ നൗഷാദ്, എസ്‌.സി.പി.ഒ സുധീഷ് , എസ്‌.സി.പി.ഒ സവാദ് അഷറഫ്, സി.പി.ഒ വിപിൻ എന്നിവരടങ്ങുന്ന സംഘമാണ് പ്രതിയെ പിടികൂടിയത്. കാസർകോട് സൈബർ ക്രൈം പൊലീസ് സ്റ്റേഷനിൽ എത്തിച്ച് ചോദ്യം ചെയ്തു.

കോടതിയിൽ ഹാജരാക്കിയ പ്രതിയെ ഒക്ടോബർ 9 വരെ റിമാൻഡ് ചെയ്തു. കേസുമായി ബന്ധപ്പെട്ട ഡിജിറ്റൽ ഉപകരണങ്ങൾ, ഇലക്ട്രോണിക് രേഖകൾ, ടെലഗ്രാം ഗ്രൂപ്പുകളിലെ വിവരങ്ങൾ എന്നിവ ഉൾപ്പെടെയുള്ള തെളിവുകൾ പൊലീസ് ശേഖരിച്ചു വരികയാണ്. സംഭവത്തിൽ കൂടുതൽ പേർക്ക് പങ്കുണ്ടോ എന്നതടക്കമുള്ള കാര്യങ്ങളിൽ അന്വേഷണം പുരോഗമിക്കുകയാണെന്ന് പൊലീസ് അറിയിച്ചു.