പള്ളിക്കര റെയിൽവെ ഓവർ ബ്രിഡ്ജ് ജൂൺ രണ്ടിന് തുറന്നേക്കും

നീലേശ്വരം : പളളിക്കരയിലെ ആറ് വരി റെയില്‍വേ മേല്‍പ്പാലം ഉടൻ തുറന്നുകൊടുക്കും.

ദേശീയപാതയില്‍ മുംബൈക്കും കന്യാകുമാരിക്കും ഇടയിലുള്ള ഏക റെയില്‍വേ ഗേറ്റ് ഒഴിവാക്കി ജൂണ്‍ രണ്ടിന് പളളിക്കര റെയില്‍വേ മേല്‍പ്പാലം തുറന്നുകൊടുക്കുമെന്നാണ് കരുതുന്നത്.

 ഓവര്‍ബ്രിഡ്ജ് നിര്‍മ്മാണം അന്തിമഘട്ടത്തിലെത്തിയെന്ന് അധികൃതര്‍ വ്യക്തമാക്കി. ടാറിംഗ് പൂര്‍ത്തിയാക്കി മാര്‍ക്കിംഗ് ജോലികൾ നടക്കുന്നു. തെരുവ് വിളക്കുകളും സ്ഥാപിച്ച്‌ കഴിഞ്ഞു. പെയിന്റിംഗ് ജോലിയും പുരോഗമിക്കുകയാണ്.  ഓവര്‍ബ്രിഡ്ജിന് മുകളില്‍ ഗര്‍ഡറുകള്‍ സ്ഥാപിക്കുന്ന ജോലിയാണ് നടന്നിരുന്നത്. 2019-ലാണ് ദേശീയ പാത പള്ളിക്കരയില്‍ മേല്പാലത്തിന്റെ പണി ആരംഭിച്ചത്. അതിനിടയില്‍ രണ്ട് വര്‍ഷത്തോളം നീണ്ട കോവിഡ് മഹാമാരി നിര്‍മ്മാണത്തെ ബാധിച്ചു. കോവിഡ് ഭീഷണി അകന്നതിന് ശേഷമാണ് പ്രവൃത്തിക്ക് വേഗത ഏറിയത്. റെയില്‍ പാളത്തിന് തൊട്ടുമുകളിലുള്ള കോമ്പോസിറ്റ് ഗര്‍ഡര്‍ സ്ഥാപിക്കുന്നതില്‍ റെയില്‍വേ അധികൃതര്‍ വരുത്തിയ കാലതാമസമാണ് ഓവര്‍ബ്രിഡ്ജ് നിര്‍മ്മാണം പിന്നെയും വൈകിച്ചത്.

ചെലവ് 64.44 കോടി രൂപയാണ്.

നീളം 780

വീതി 45 മീറ്റര്‍

ആയിരക്കണക്കിന് വാഹനങ്ങള്‍ ഇരമ്പുന്ന ദേശീയപാതയിലെ ഏറ്റവും വലിയ കല്ലുകടി ആയിരുന്നു പള്ളിക്കര റെയില്‍വേ ഗേറ്റിന് മുന്നിലെ കാത്തുകെട്ടിക്കിടപ്പ്. ട്രെയിനുകള്‍ കടന്നുപോകുമ്പോള്‍ വാഹനങ്ങളുടെ നിര തെക്ക് കാര്യങ്കോട് പാലത്തോളവും വടക്ക് കരുവാച്ചേരി വരെയും നീണ്ടുപോകാറുണ്ട്. അതിഗുരുതരാവസ്ഥയിലുള്ള രോഗികളെയും കൊണ്ട് മംഗളൂരുവിലേക്കും കണ്ണൂരിലേക്കും പോകുന്ന ആംബുലൻസുകളടക്കം റെയില്‍വേ ഗേറ്റിന് മുന്നില്‍ നില്‍ക്കേണ്ടിവരുന്ന ഗതികേടിലായിരുന്നു. ദേശീയപാതയിലെ മുഴുവൻ ഗേറ്റുകളും ഓവര്‍ബ്രിഡ്ജിലേക്ക് മാറിയിട്ടും പള്ളിക്കരയെ പരിഗണിക്കാതെ വന്നതിനെ തുടര്‍ന്ന് അന്നത്തെ  എം.പി പി.കരുണാകരൻ സത്യാഗ്രഹം അനുഷ്ഠിച്ചതോടെയാണ് കേന്ദ്രസര്‍ക്കാര്‍ പാലത്തിന് പച്ചക്കൊടി കാട്ടിയത്.