തദ്ദേശ തിരഞ്ഞെടുപ്പ്: 14 കൊടികളും 13 പ്രചരണ ബോർഡുകളും നീക്കി

കാഞ്ഞങ്ങാട് : തദ്ദേശതിരഞ്ഞെടുപ്പ് പ്രചരണ പ്രവർത്തനങ്ങൾ നിയമപരമാണോ എന്ന് നിരീക്ഷിക്കുന്നതിനായി രൂപം നൽകിയ ആന്റി ഡിഫൈസ്മെന്റ് സ്ക്വാഡ് ജില്ലയിൽ ഇന്ന് നീക്കം ചെയ്തത് പൊതുസ്ഥലങ്ങളിൽ സ്ഥാപിച്ച 14 കൊടികളും  പത്ത് പ്രചരണ ബോർഡുകളും മൂന്ന് ഫ്ലക്സുകളും ഒരു പോസ്റ്ററും. മഞ്ചേശ്വരം താലൂക്കിൽ ബൈക്കട്ട മുതൽ മീഞ്ച വരെയുള്ള റോഡിനു സമീപത്തായി സ്ഥാപിച്ച രണ്ടു കൊടികളും, മഞ്ചേശ്വരം ദേശീയപാത സർവീസ് റോഡിന് സമീപം രണ്ട് കൊടികളും ഗെരുക്കട്ടയിൽ സ്ഥാപിച്ച ഫ്ളക്സും ബങ്ക്രയിലെ പ്രചരണ ബോർഡുമാണ് നീക്കം ചെയ്തത്. കാസർകോട് താലൂക്കിൽ ത്രിതല പഞ്ചായത്ത് തദ്ദേശ തിരഞ്ഞെടുപ്പ് സ്ഥാനാർത്ഥികൾക്കായി  ശങ്കരപാടി, ചെങ്കള പ്രാഥമിക ആരോഗ്യ കേന്ദ്രം എന്നിവിടങ്ങളിലെ ആറ് പ്രചാരണ ബോർഡുകളും ശങ്കരംപാടി, മാണിമൂല, ദേലംപാടി,പല്ലവോട് എന്നിവിടങ്ങളിലെ ഗ്രാമപഞ്ചായത്ത് സ്ഥാനാർത്ഥികളുടെ  പ്രചരണബോർഡുകളും   പൊവ്വൽ, പാടിയത്തടുക്ക, ആദൂർ-പള്ളം, അടൂർ ഇവന്തൂർ എന്നിവിടങ്ങളിൽ അനധികൃതമായി സ്ഥാപിച്ച വിവിധ രാഷ്ട്രീയപാർട്ടികളുടെ അഞ്ച് കൊടികളും  പള്ളഞ്ചിയിലെ പ്രചരണപോസ്റ്ററുമാണ്  നീക്കം ചെയ്തത്.വെള്ളരിക്കുണ്ട് താലൂക്കിൽ കരിന്തളം, കക്കടവ് എന്നിവിടങ്ങളിൽ സ്ഥാപിച്ച പ്രചരണ ഫ്ലക്സുകളും കരിന്തളം, കക്കടവ്, ബാദുർ എന്നിവിടങ്ങളിൽ സ്ഥാപിച്ച വിവിധ രാഷ്ട്രീയപാർട്ടികളുടെ അഞ്ചു കൊടികളും ആണ് നീക്കിയത്. ഈ മൂന്നു താലൂക്കുകളിലെയും ആന്റി ഡിഫേസ്മെന്റ് സ്‌ക്വാഡിന്റെ ചുമതലയുള്ള ഭൂരേഖ തഹസിൽദാർ ടി പി ഷമീർ, സ്യൂട്ട്  സെക്ഷൻ സീനിയർ സൂപ്രണ്ട് വി ശ്രീകുമാർ, എൽ എ പിഡബ്ല്യുഡി സ്പെഷ്യൽ തഹസിൽദാർ പി പ്രമോദ് എന്നിവരടങ്ങുന്ന സംഘമാണ് പ്രവർത്തനങ്ങൾക്ക് നേതൃത്വം നൽകിയത്.