രാഷ്ട്രീയ പാർട്ടികളുടെ 17 കൊടികളും ഏഴ് പ്രചരണ ബോർഡുകളും നീക്കം ചെയ്തു

കാഞ്ഞങ്ങാട് :  തദ്ദേശതിരഞ്ഞെടുപ്പ് പ്രചരണ പ്രവർത്തനങ്ങളുടെ ഭാഗമായി ജില്ലയിലെ വിവിധ ഭാഗങ്ങളിൽ നിന്ന് നിയമവിരുദ്ധമായി പ്രചരണത്തിനുപയോഗിച്ച വിവിധ രാഷ്ട്രീയ പാർട്ടികളുടെ 17 കൊടികളും ഏഴ് പ്രചരണബോർഡുകളും ഏഴ് പോസ്റ്ററുകളും നീക്കം ചെയ്തു. മഞ്ചേശ്വരം താലൂക്കിലെ കുമ്പള, പുത്തിഗെ ഗ്രാമ പഞ്ചായത്തിലെ വിവിധ പ്രദേശങ്ങളിൽ പൊതുസ്ഥലത്ത് സ്ഥാപിച്ച മൂന്ന് കൊടികളും കാസർ കോട് താലൂക്കിലെ മധുർ ഗ്രാമപഞ്ചായത്ത് പരിധിയിൽ നിന്ന് രണ്ട് കൊടികളും ഹോസ്ദുർഗ് താലൂക്കിലെ നീലേശ്വരം മുനിസിപ്പാലിറ്റി, ചെറുവത്തൂർ, പടന്ന, തൃക്കരിപ്പൂർ പഞ്ചായത്ത് പരിധികളിൽ നിന്ന് 12 കൊടികളും ഏഴ് പ്രചരണബോർഡുകളും ഏഴ് പോസ്റ്ററുകളുമാണ് നീക്കം ചെയ്തത്.  മൂന്നു താലൂക്കുകളിലെയും ആന്റി ഡിഫേസ്മെന്റ് സ്‌ക്വാഡിന്റെ ചുമതലയുള്ള ഭൂരേഖ തഹസിൽദാർ ടി. പി. ഷമീർ, സ്യൂട്ട്  സെക്ഷൻ സീനിയർ സൂപ്രണ്ട് വി. ശ്രീകുമാർ, എൽ. എ. പിഡബ്ല്യുഡി സ്പെഷ്യൽ തഹസിൽദാർ പി. പ്രമോദ് എന്നിവരടങ്ങുന്ന സംഘമാണ് പ്രവർത്തനങ്ങൾക്ക് നേതൃത്വം നൽകിയത്.