എം.രാഘവൻ കോട്ടച്ചേരി സർവീസ് സഹകരണ ബാങ്ക് പ്രസിഡൻ്റ് സ്ഥാനം രാജിവച്ചു

കാഞ്ഞങ്ങാട്: സിപിഎമ്മിന്റെ വിപുലീകൃത സമ്മേളനത്തിന് പിന്നാലെ സി.പി.എം കാഞ്ഞങ്ങാട് ഏരിയ കമ്മിറ്റി അംഗം എം. രാഘവൻകോട്ടച്ചേരി സർവീസ് സഹകരണ ബാങ്ക് പ്രസിഡൻ്റ് സ്ഥാനമൊഴിഞ്ഞു. സഹകരണ സംഘം റജിസ്ട്രാർക്ക് അദ്ദേഹം രാജിക്കത്ത് സമർപ്പിച്ചു.

  ജില്ലയിലെ പ്രധാന നേതാക്കളിൽ ഒരാളായ രാഘവൻ

മുൻ ആഭ്യന്തരമന്ത്രിയും സിപിഎം സംസ്ഥാന സെക്രട്ടറിയുമായിരുന്ന പരേതനായ കോടിയേരി ബാലകൃഷ്ണന്റെ കൂടെ ദീർഘകാലം പ്രൈവറ്റ് സെക്രട്ടറിയുമായിരുന്നു. കോട്ടച്ചേരി സർവീസ് സഹകരണ ബാങ്ക് പ്രസിഡൻ്റ് സ്ഥാനമൊഴിഞ്ഞത്  നേതൃത്വം നിരന്തരമായി അവഗണിക്കുന്നതിനെ തുടർന്നാണെന്നാണ് സൂചന.

ജില്ലാ കമ്മിറ്റിയിൽ പ്രത്യേക ക്ഷണിതാക്കളായി ഏതാനും പേരെ ഉൾപ്പെടുത്തിയപ്പോഴും രാഘവനെ    തഴിഞ്ഞതായി പരാതി ഉയർന്നിരുന്നു.  പാർട്ടി നിരന്തരം തഴയുന്നു എന്ന പരാതിയിലാണ് രാജി എന്നാണ് അറിയുന്നത്.

രാജിക്കത്ത് നൽകിയതായി എം. രാഘവൻ വ്യക്തമാക്കിയെങ്കിലും പ്രസിഡൻ്റ് സ്ഥാനം ഒഴിഞ്ഞത് ഏത് കാരണത്താലാണെന്ന് അദ്ദേഹം വ്യക്തമാക്കിയില്ല.