മുൻകൂറായി തുക കെട്ടിവെച്ചാൽ പോളിംഗ് ബൂത്തിലെ ദൃശ്യങ്ങൾ ചിത്രീകരിക്കുന്നതിന് സൗകര്യം ഒരുക്കും: ജില്ലാ കലക്ടർ

കാഞ്ഞങ്ങാട് : മുൻകൂറായി തുക കെട്ടിവെച്ച് രസീത് ഹാജരാക്കിയാൽ പോളിംഗ് ബൂത്തിലെ ദൃശ്യങ്ങൾ ചിത്രീകരിക്കുന്നതിനുള്ള സൗകര്യങ്ങൾ ഒരുക്കുമെന്ന്  കാസർകോട് ജില്ലാ കലക്ടർ കെ ഇമ്പശേഖർ.  തദ്ദേശ തിരഞ്ഞെടുപ്പ് 2025, എസ്ഐആർ എന്നീ വിഷയങ്ങളിൽ വിവിധ രാഷ്ട്രീയ പാർട്ടി പ്രതിനിധികളുമായി ചേമ്പറിൽ നടന്ന യോഗത്തിൽ സംസാരിക്കുകയായിരുന്നു കലക്ടർ. ജില്ലയിലെ 119 പ്രശ്നബാധിത ബൂത്തുകളിൽ സംസ്ഥാന തിരഞ്ഞെടുപ്പ് കമ്മീഷൻ നിരീക്ഷണ ക്യാമറകൾ സ്ഥാപിച്ചിട്ടുണ്ട്. നിരീക്ഷണ ക്യാമറകൾ സ്ഥാപിക്കാത്ത ബൂത്തുകളിലെ ദൃശ്യങ്ങൾ ചിത്രീകരിക്കുന്നതിനുള്ള സൗകര്യങ്ങളാണ് പണം അടച്ചാൽ ലഭ്യമാക്കുക.  ഡിസംബർ ഒന്നു മുതൽ ഇലക്ട്രോണിക് വോട്ടിംഗ് മെഷീനുകൾ അതാത് ബ്ലോക്ക് പഞ്ചായത്തുകളിലെ സ്ട്രോങ്ങ് റൂമുകളിലേക്ക് മാറ്റും. തിരഞ്ഞെടുപ്പ് പെരുമാറ്റ ചട്ടങ്ങളും ഹരിത പ്രോട്ടോക്കോളും പാലിക്കുന്നതിൽ രാഷ്ട്രീയ പാർട്ടികൾ   ശ്രദ്ധ പുലർത്തണം.  പ്രത്യേക തീവ്ര വോട്ടർ പട്ടിക പരിഷ്കരണവുമായി ബന്ധപ്പെട്ട് ജില്ലയിൽ ഇനിയും പൂർത്തീകരിക്കാനുള്ള എന്യൂ മാറേഷൻ ഫോമുകളുടെ ഡിജിറ്റലൈസേഷന് ബൂത്ത് ലെവൽ ഏജന്റ് മാരുടെ സഹകരണം ഉണ്ടാകണമെന്നും എസ് ഐ ആറുമായി ബന്ധപ്പെട്ട് പ്രസിദ്ധീകരിക്കാൻ ഇരിക്കുന്ന കരട് വോട്ടർ പട്ടികയിൽ പേരില്ലെങ്കിൽപോലും ഫോം സിക്സ് പൂരിപ്പിച്ചു നൽകിയാൽ പുതിയ വോട്ടർ പട്ടികയിൽ ജനങ്ങൾക്ക് പേര് ചേർക്കാം എന്നും കലക്ടർ പറഞ്ഞു. യോഗത്തിൽ ഇലക്ഷൻ ഡെപ്യൂട്ടി കലക്ടർ എൻ ഗോപകുമാർ വിവിധ രാഷ്ട്രീയ പാർട്ടി പ്രതിനിധികളായ  പി രമേശ്, ബിജു ഉണ്ണിത്താൻ, ഉമ്മർ പാടലടുക്ക, സിദ്ദിഖ് ചേരങ്കൈ, മാമുനി വിജയൻ എന്നിവർ പങ്കെടുത്തു

  തദ്ദേശ സ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പിന് ഉപയോഗിക്കുന്ന ഇലക്ട്രോണിക് വോട്ടിംഗ് മെഷീനുകളുടെ റാൻഡമൈസേഷൻ ജില്ലാ തെരഞ്ഞെടുപ്പ് ഉദ്യോഗസ്ഥനായ ജില്ലാ കലക്ടർ നിർവഹിച്ചു

ആകെ 1760 കൺട്രോൾ യൂണിറ്റുകളും 4920 ബാലറ്റ് യൂണിറ്റുകളും ഇതിലേക്കായി ഉപയോഗിക്കുന്നുണ്ട്

ബന്ധപ്പെട്ട ബ്ലോക്ക്പഞ്ചായത്ത്/ മുനിസിപ്പാലിറ്റി  സെക്രട്ടറിമാർക്ക് അനുവദിച്ചിരിക്കുന്ന മെഷീനുകളുടെ വിതരണം ഡിസംബർ 2, 3തീയതികളിൽ നടക്കും.