ബുധനാഴ്ച സ്കൂള് തുറക്കുന്നതിന്റെ പശ്ചാത്തലത്തില് കുട്ടികള്ക്ക് സുരക്ഷ ഉറപ്പാക്കുമെന്ന് സംസ്ഥാന പോലീസ് മേധാവി അനില്കാന്ത് അറിയിച്ചു. വിദ്യാര്ത്ഥികള്ക്ക് സുരക്ഷിതവും സൗഹാര്ദ്ദപരവുമായ പഠനാന്തരീക്ഷം ഉറപ്പുനല്കുന്ന വിധത്തില് പോലീസ് ക്രമീകരണങ്ങള് ഏര്പ്പെടുത്താന് ജില്ലാ പോലീസ് മേധാവിമാര്ക്ക് അദ്ദേഹം നിര്ദ്ദേശം നല്കി.
സ്കൂള് തുറക്കുന്നതുമായി ബന്ധപ്പെട്ട് നിരത്തുകളില് ഉണ്ടാകുന്ന തിരക്ക് കുറയ്ക്കാന് നടപടി സ്വീകരിക്കും. സ്കൂള് ബസുകളിലും മറ്റ് സ്വകാര്യവാഹനങ്ങളിലും എത്തുന്ന കുട്ടികളുടെ സുരക്ഷ ഉറപ്പാക്കാനും നിര്ദ്ദേശമുണ്ട്. വാഹനങ്ങളില് കുട്ടികളെ കുത്തിനിറച്ച് കൊണ്ടുപോകാന് അനുവദിക്കില്ല. വാഹനങ്ങളുടെ ഫിറ്റ്നെസ്, സുരക്ഷാ ക്രമീകരണങ്ങള് എന്നിവ ഉറപ്പാക്കണം.
സ്കൂള് പരിസരങ്ങളില് കുട്ടികളെ റോഡ് മുറിച്ചുകടത്തുന്നതിന് പോലീസിന്റെയും സ്റ്റുഡന്റ് പോലീസ് കേഡറ്റുകളുടെയും സേവനം ലഭ്യമാക്കും. സ്കൂള് കുട്ടികളെ കൊണ്ടുപോകുന്ന വാഹനങ്ങളിലെ ഡ്രൈവര്മാര് ക്രിമിനല് കേസുകളില് ഉള്പ്പെട്ടിട്ടില്ലെന്നും മറ്റ് സ്വഭാവദൂഷ്യങ്ങള് ഇല്ലെന്നും സ്കൂള് അധികൃതര് ഉറപ്പാക്കണം. ഇക്കാര്യത്തില് വ്യക്തത വരുത്തിയശേഷം മാത്രമേ പോലീസ് അനുമതി നല്കൂ. സ്കൂള് അധികൃതരുടെ സഹകരണത്തോടെ സ്കൂള് വാഹനങ്ങളിലെ ഡ്രൈവര്മാര്ക്കും മറ്റ് ജീവനക്കാര്ക്കും ബോധവല്ക്കരണ ക്ലാസുകള് നല്കും.
കുട്ടികളെ സ്കൂളില് എത്തിച്ചശേഷം സ്വകാര്യവാഹനങ്ങള് സ്കൂളിന് സമീപത്തെ റോഡരികില് പാര്ക്ക് ചെയ്യാന് പാടില്ല. സ്കൂള്കുട്ടികളുമായി യാത്ര ചെയ്യുന്ന വാഹനങ്ങളിലെ ഡ്രൈവര്മാര് മദ്യപിച്ച് വാഹനം ഓടിക്കുന്നതു പരിശോധിക്കാന് അപ്രതീക്ഷിത വാഹനപരിശോധന നടത്താനും ഡി.ജി.പി നിര്ദ്ദേച്ചിട്ടുണ്ട്.
സ്കൂള് പരിസരങ്ങളില് മയക്കുമരുന്ന്, മറ്റ് പുകയില ഉല്പ്പന്നങ്ങള് എന്നിവയുടെ വില്പ്പനയ്ക്കെതിരെ കര്ശന നടപടി സ്വീകരിക്കും. സ്കൂള് പരിസരങ്ങളിലെ പിടിച്ചുപറി, മോഷണം എന്നിവയ്ക്കെതിരെ നിരീക്ഷണം ശക്തമാക്കും.കുട്ടികള്ക്കെതിരെയുളള ലൈംഗികാതിക്രമങ്ങള് തടയുന്നതിന് പ്രത്യേകശ്രദ്ധ പുലര്ത്താനും നിര്ദ്ദേശമുണ്ട്. കുട്ടികളുമായി യാത്ര ചെയ്യുന്ന വാഹനങ്ങളിലെ ജീവനക്കാര് ഉള്പ്പെടെയുളളവരുടെ സഭ്യമല്ലാത്ത പ്രവൃത്തികള് കണ്ടെത്തി കര്ശന നടപടി സ്വീകരിക്കും.
സൈബര് സുരക്ഷ, സ്വയം പ്രതിരോധ പരിശീലനം, രക്ഷിതാക്കള്ക്കുള്ള ബോധവല്ക്കരണം എന്നിവയ്ക്ക് പോലീസ് ഉദ്യോഗസ്ഥരുടെ സേവനം ലഭ്യമാക്കാനും ഡി.ജി.പി നിര്ദ്ദേശിച്ചിട്ടുണ്ട്.
സ്കൂൾ,അങ്കണവാടി പരിസരങ്ങൾ ശുചീകരിക്കുന്നതിനും കൊതുകിന്റെ ഉറവിടങ്ങൾ നശിപ്പിക്കുന്നതിനും ആവശ്യമായ പ്രവർത്തനങ്ങൾ എല്ലാ സ്ഥാപനങ്ങളിലും നടത്തണം. കുടിവെള്ള സ്രോതസ്സുകൾ ശുചികരിക്കാനും കുടിവെള്ള സാമ്പിളുകൾ ഗുണനിലവാര പരിശോധനയ്ക്ക് അയക്കാനും അതത് സ്ഥാപനമേധാവികൾ നടപടികൾ സ്വീകരിക്കേണ്ടതാണ്. കുടിവെള്ളസ്രോതസ്സായി ഉപയോഗിക്കുന്ന മുഴുവൻ കിണറുകളും ആരോഗ്യ പ്രവർത്തകരുടെ മേൽനോട്ടത്തിൽ നിർബന്ധമായും ക്ലോറിനേറ്റ് ചെയ്യേണ്ടതാണ്. ഓവർ ഹെഡ്
ടാങ്കുകൾ മറ്റു ജലസംഭരണികൾ എന്നിവ
കഴുകി വൃത്തിയാക്കാനും ആഴ്ചയിൽ ഒരു ദിവസം വെള്ളം മുഴുവൻ ഒഴുക്കിവിട്ട് ഉണക്കി ഉപയോഗിക്കാനും ശ്രദ്ധിക്കേണ്ടതാണ്. ഉച്ചഭക്ഷണം പാചകം ചെയ്യുന്ന സ്ഥലം ഭക്ഷണസാധനങ്ങൾ സൂക്ഷിക്കുന്ന സ്ഥലം ഭക്ഷണസാധനങ്ങൾ നിർമ്മിക്കാനും സൂക്ഷിക്കാനും ഉപയോഗിക്കുന്ന പാത്രങ്ങൾ ഇവയുടെ എല്ലാം ശുചിത്വം കൃത്യമായ ഇടവേളകളിൽ പരിശോധിച്ച് ഉറപ്പുവരുത്തേണ്ടതാണ്.കുട്ടികൾ തിളപ്പിച്ചാറ്റിയ വെള്ളം മാത്രം ആണ് കുടിക്കാൻ ഉപയോഗിക്കുന്നത് എന്ന് രക്ഷിതാക്കളും അധ്യാപകരും ഉറപ്പുവരുത്തേണ്ടതാണ് .
കോവിഡ് വ്യാപനസാധ്യത പൂർണമായും വിട്ടുമാറിയിട്ടില്ലാത്തതിനാൽ കോവിഡ് സുരക്ഷാ മാനദണ്ഡങ്ങൾ പാലിക്കാൻ അധ്യാപകരും വിദ്യാർത്ഥികളും ശ്രദ്ധിക്കേണ്ടതാണ്. മാസ്കിന്റെ ഉപയോഗം നിർബന്ധമായും അധ്യാപകർക്കും കുട്ടികൾക്കും ഇടയിൽ ഉറപ്പുവരുത്തേണ്ടതാണ്. 12 വയസിനു മുകളിലുള്ള കുട്ടികൾക്ക് നിർബന്ധമായും വാക്സിൻ സ്വീകരിക്കാൻ ആവശ്യമായ നടപടികൾ രക്ഷിതാക്കളും അധ്യാപകരും നടത്തേണ്ടതാണ്. അധ്യനവർഷാരംഭത്തിൽ തന്നെ വാക്സിൻ എടുക്കാൻ അർഹതയുള്ള പ്രായപരിധിയിൽ പെട്ട മുഴുവൻ കുട്ടികൾക്കും വാക്സിൻ ലഭ്യമാക്കാൻ ആവശ്യമായ പ്രവർത്തനങ്ങൾ ആരോഗ്യ വകുപ്പിൻറെ സഹകരണത്തോടെ ഏറ്റെടുത്തു നടത്തണം. പകർച്ചവ്യാധി വ്യാപനം പ്രതിരോധിക്കാൻ ആവശ്യമായ മുൻകരുതൽ പ്രവർത്തനങ്ങളുമായി എല്ലാവരും സഹകരിക്കണമെന്നും കുട്ടികളുടെ ആരോഗ്യപൂർണമായ അധ്യയനം ഉറപ്പുവരുത്താൻ ഇടപെടലുകൾ നടത്തണമെന്നും ജില്ലാ മെഡിക്കൽ ഓഫീസർ അഭ്യർത്ഥിച്ചു.
0 Comments