മകളെയും പത്ത് വയസുകാരിയെയും ആസിഡ് ഒഴിച്ച് കൊല്ലാൻ ശ്രമിച്ച പ്രതി അറസ്റ്റിൽ

കാഞ്ഞങ്ങാട് : തിരുവോണ  ദിവസം  മകളെയും പത്ത് വയസുകാരിയെയും ആസിഡ് ഒഴിച്ച് കൊല്ലാൻ ശ്രമിച്ച പ്രതി അറസ്ററിൽ. കരിക്കെ ആനപ്പാറയിലെ കെ.സി. മനോജ് 48 ആണ് അറസ്ററിലായത്. പാറക്കടവിലെ ഒരു വീട്ടിൽ ഒളിവിൽ കഴിയുകയായിരുന്ന പ്രതിയെ രാജപുരം പൊലീസ് ഇൻസ്പെക്ടർ രാജീവൻ്റെ നേതൃത്വത്തിൽ അറസ്ററ് ചെയ്യുകയായിരുന്നു.

സംഭവത്തിൽ കൊലപാതക ശ്രമത്തിന് കേസെടുത്ത പൊലീസ് പ്രതിക്കായി വ്യാപക അന്വേഷണത്തിലായിരുന്നു. പാണത്തൂർ പാറക്കടവിൽ 5 ന് രാവിലെ 10.30 മണിയോടെയാണ് സംഭവം. പ്രതിയുടെ മകളായ കർണാടക കരിക്കെ സ്വദേശിനി കെ.എം. നീനു മോൾ 17,അമ്മാവൻ പാറക്കടവിലെ മോഹനൻ്റെ മകൾ 

എം.മനിയ10 എന്നിവർക്ക് നേരെയായിരുന്നു ആ സിഡാക്രമണമുണ്ടായത്. അമ്മാവൻ്റെ പാറക്കടവിലെ വീട്ടിലായിരുന്നു നീനു താമസിച്ചിരുന്നത്.  വീട്ടുമുറ്റത്ത് അതിക്രമിച്ച് കയറിയ പ്രതി കൈയിൽ കരുതിയിരുന്ന ആസിഡ് കുട്ടികളുടെ ദേഹത്ത് ഒഴിക്കുകയായിരുന്നു. കൈ കാലുകൾക്കും മുഖത്തും ഉൾപെടെ സാരമായി പൊള്ളലേറ്റിരുന്നു. ഇരുവരും ആശുപത്രിയിൽ ചികിൽസയിലാണ്. മകളും ഭാര്യയും പിണങ്ങി മാറി താമസിക്കുന്ന വിരോധമാണ് സംഭവത്തിന് കാരണം. പ്രതിയെ ഹോസ്ദുർഗ് കോടതിയിൽ ഹാജരാക്കും.

ചിത്രം : പാറക്കടവിലെ വീട്ടിൽ ഒളിവിൽ കഴിഞ്ഞ പ്രതിയെ പിടികൂടാനെത്തിയ പൊലീസ് ഇൻസ്പെക്ടർ രാജീവൻ, പ്രതിയും.