അബുദാബിയിൽ നിന്നുമുള്ള യാത്രക്കിടെ കൊച്ചിയിൽ കാണാതായ യുവാവിനെ കണ്ടെത്തി

കാഞ്ഞങ്ങാട്  :അബുദാബിയിൽ നിന്നും നാട്ടിലേക്ക് പുറപ്പെട്ട ശേഷം  കാണാതായ യുവാവിനെ ബംഗ്ളുരുവിൽ പൊലീസ് കണ്ടെത്തി. 

 ബേഡഡുക്ക ഗദ്ധമൂലയിലെ കൃഷ്ണപ്രസാദിനെ 26 യാണ് കണ്ടെത്തിയത്. അബുദാബിയിലെ ഇത്തിയാദ് കമ്പനിയിൽ ജോലി ചെയ്യുന്ന യുവാവ് ഇക്കഴിഞ്ഞ 21 ന്

വൈകീട്ട് 2.45 ന് അബുദാബിയിൽ നിന്നും നാട്ടിലേക്ക് തിരിച്ച് കൊച്ചിയിൽ വിമാനം ഇറങ്ങിയ ശേഷമാണ് കാണാതായത്. വിട്ടുകാർ  22 ന് വിളിച്ചപ്പോൾ കൃഷ്ണപ്രസാദിൻ്റെ മൊബൈൽ ഫോൺ സ്വിച്ച്ഓഫിലായിരുന്നു. സുഹൃത്തിനെ വിളിച്ചപ്പോഴാണ് നാട്ടിലേക്ക് വന്നതായി പറഞ്ഞത്. എന്നാൽ വീട്ടിൽ എത്തിയില്ല. ഇതേ തുടർന്ന് ബന്ധുക്കൾ ബേഡകം പൊലീസിൽ പരാതി നൽകുകയായിരുന്നു.  ഇൻസ്പെക്ടർ രഞ്ജിത്ത് രവീന്ദ്രൻ്റെ നേതൃത്വത്തിൽ നടന്ന അന്വേഷണത്തിൽ യുവാവ് കൊച്ചി എയർപോർട്ടിൽ ഇറങ്ങിയ ശേഷം കയറി പോയ ടാക്സി കാറിനെ കണ്ടെത്തിയിരുന്നു.  മൊബൈൽ ഫോൺ സ്വിച്ച്ഓഫിലായതിനാൽ സൈബർ സെൽ അന്വേഷണം വഴി മുട്ടിയിരുന്നു. ഇതിനിടയിൽ യുവാവ് മറ്റൊരു മൊബൈൽ ഫോൺ ഉപയോഗിക്കുന്നതായി പൊലീസ് കണ്ടെത്തി. ഇതോടെ സൈബർ സെൽ പിന്തുടർന്നാണ് യുവാവിനെ കണ്ടെത്തിയത്. എറണാകുളത്തായിരുന്ന ബേഡകം പൊലീസ് ബംഗ്ളുരുവിലെത്തുകയായിരുന്നു. പൊലീസ് എത്തുമ്പോൾ ചെന്നെയിലേക്ക് പുറപ്പെടാൻ ഹോട്ടൽ മുറിയിൽ ഒരുക്കത്തിലായിരുന്നു യുവാവ്. മുംബൈ, ഗോവ എന്നിവിടങ്ങളിൽ കറങ്ങിയ ശേഷം യുവാവ് ബംഗ്ളുരുവിൽ എത്തുകയായിരുന്നു. യുവാവിനെ ബേഡകത്ത് എത്തിച്ചു. കോടതിയിൽ ഹാജരാക്കും.